Gosses ed' corons
Gosses ed'corons
Quand j'étos cor un goss' avec mes camarates,
El jeudi arrivé, in savot s'amuser
A l'doche berlicoco, à l'toupie, à guiss'bate
A l'pèque à épinoques, in étot acharnés
Quand j'étos cor un goss' avec mes camarates,
El jeudi arrivé, in savot s'amuser
A l'doche berlicoco, à l'toupie, à guiss'bate
A l'pèque à épinoques, in étot acharnés
ln s'él'vot ed' bonne heure pour placher des attrapes
ln juot à la line avec des pièches deux sous,
Avec des biscayens in juot pour des mappes.
ln avot des muchettes un p'tit peu tout partout.
Tout in bas d'ech' terril in cuisot des pétotes
Et cha n'impéchot pas qu'in les mingeot tout crutes ;
ln creuyot qu'i étotent cuites parc' qui z'étotent fort cautes.
In s'régalot ed' vir chés tiots qui ravisotent.
ln cueillot des fourdaines, in mingeot des poiriettes,
A cartes ch'étot l'mariach' ou bien l'cul déplumé,
Ech' pot cha pouvot ét' un p'tit sac ed pirettes :
Pot, rata, sus l'tas et les boyaux salés.
Quand i faisot biau pour apprinte à nager
ln infonçot s'tête dins in séau plein d'ieau ;
A croucrou dins l'batteusse, cha piquot à sin nez
Nos parints i riotent ed' vir leu gosses si bieaux.
Mais pour savoir nager in avot nou secret.
Au momint des vacances et tout déshabillés,
Espadrilles à nou pieds, muchés par un mouchoir,
ln plongeot à plat vint' dins l'fond d'un abreuvoir.
Ech' gouf', qu'in l'app'lot ; in étot ingelés
D'nager à pattes ed'tchiens tout comme chés Polonais.
Ech' gart' ed temps in temps faisot semblant d'crier;
Avec nous loques sous l'bras, in avot vite filé.
ln faisot des dragons avec du vieux journal,
Du papin à l'farine et un morcieau d'fichelle.
ln courant dins l'z'éteules in lévot des cornales ;
Ech' dragon i volot si haut qu' chés hirondelles.
ln hiver in avot des galoches à nou pieds,
Avec des daches à z'ailes qu'in s' dépéchot d'user
Pour glicher près d'el' pompe; in allongeot l' glichate :
Inn' a qu'i avotent des boches aussi grosses qu'eune tomate.
Dins nou classe, à l'école, in étot plus d' cinquante;
Moitié pour chés français, l'aut' moitié étrangers;
Nos batalles inter nous n'étotent pas trop mécantes ;
ln classe souvint ch' premier ch'étot un polonais.
Au momint d'el ducasse in cassot nou tirelire,
ln montot à ch' casse-gueul' et à chés bilanchettes ;
y avot eun' baraquaine qu'al' racontot l'avenir,
Mais l'Iind'main surtout fallot pas faire queuette.
Aujourd'hui j'min souviens comme si ch'étot hier!
Ech' voudros vous arvir tartous mes bons copains !
Hélas! inn' a gramint qui arposent au cim'tière,
Et j 'peux pas m'impécher d 'pinser à vous souvint.
Adéodat Larivière
Commentaires
le 15-04-2011 à 09:57:14
On ressent bien votre émotion que vous savez nous faire partager.
Emouvant - Sympathique - plein d'amour -
Félicitations.
Grv
le 15-04-2011 à 19:42:10
que de bio souvenir que vous nous racontez la ,,qu el bonheur c'etait dans cette période avec rien on etait heureux achteur y ne savent pu s'amusser qu'avec de l'eletronique et tou ceu din sin coin notre jeunesse etait bin plus belle avant un grand merci ADelat vous nous avez replonger 50 ans en arriere ,
grosse baisse et bonne soirée
Mady
le 22-04-2011 à 22:29:33
un chti-landais
site/blog
le 30-04-2011 à 11:21:33
que c'est chaleureux...! vous avez su retranscrire par votre poëme votre amour du passé, vos souvenirs heureux et vos émotions; c'est tout à votre honneur! ne pas oublié le passé, ne garder que les bons moments et laisser le reste de côté... le passé, toute une histoire...!
toutes mes félicitations
amicalement
corine
site/blog
le 14-05-2011 à 22:23:20
qui pourrot m'espliquer ?
un vraimint bieau poème....