In cope chés abes "A.HECQUET"

ln cope ches abes
ln cop' ches ab's ém femme ... in cop' tous ches viux abes ;
Cheuss qu'in a vus tout jonn's aveuc eun' branque ou deux !
Combin d'fos qu'ej t'ai dit: pour euss y pond' leus oeufs
Meimm' ches moniaux d'par chi les treuv'tent trop minabes !


É pi i'z ont grandi ... i'z ont fait comm' nous autes !
Quand i'z ont eu sept ans, in f'sot nou communion!. ..
Y'avot dja bin longtemps qu'j'y dénichos mouchons
Pi ti qu'té faisos l'guet pour pas qu'ches gart's i m'votent.


Quand t'as eu dix huit ans (cha keyot un diminche)
Té vos qu'j'ai bonn' souv'nanc' ... t'avos t'biell' robe à fleurs !.,
Ches moniaux i sifflot'nt à s'in wuidier leu coeur ...
Ches ab's i nous muchot'nt pour pas qu'in nous dérinche.


ln étot v'nus dins ch'bos après l'sorti' d'el messe;
Nous in voulot surtout (in pluss d'y faire un tour)
Tailler nou deux prénoms a 'c' un coeur à l'intour ;
Ti, té m'as dit: j't'ai quer !... Mi j't'ai fait m'premièr' baisse!


ln y est r'vénu souvint! Aussi d'fil in aiguille
Nous aut's in s'a marié quand l'z' ab's portot'nt glachons ...
Six mos après ch'jour là ch'tot la fin d'ches bourgeons
Ches feull 's nous attindot'nt... Ti, t'attindos nou fille.


Nan, n'brais pa m'femm' ! N'brais pas! qui veux-tu qui s'oppose
A cheuss pour qui ches ab's n's'ront toudis que d'largeint ?
Oubli' tout nou jeunesse ... oubli' tous nous sermints,
J't'in suppli' m'femm', n'brais pu ... faut pinser à aut' cosse!


T'es comm' mi : Té n'peux pas! Pourtant n'faut pas qu'té braiches !
Des ab's tout comme el note y in a tout plein pi cor;
ln Lorrainne ... in Bretann' ... Dins l'Sud tout comm' dins ch'Nord,
y in a pour fair' des meub's, y in a pour fair' des berches !


Des berch's ém femm', des berch's ... pour les infants d'nou fille ...
Allez n'brais pu... Ch'est tout... Essuî-te dins t'n écour ;
Ch'est pas parc' qu'in s'ra morts qu'i n'y' éra pu d'amour.
Ech l'abe et pi nous aut's : in a fait oeuve utile!


Allez, viens chi m'femm', faut pas rester dins l'ombe
Un ab' meimm' plein d'souv'nirs cha n's'ras jamais qu'du bos !
Nan, brais pu m'femm', n'brais pu, dis me ch' qui t'fait du mau.


- Ch'est ch'bos là qu'i faudrot quand in ira dins l'tombe !
A. Hecquet



24/03/2012
4 Poster un commentaire

A découvrir aussi


Inscrivez-vous au site

Soyez prévenu par email des prochaines mises à jour

Rejoignez les 783 autres membres

Referencement
Recommander ce site | Contact | Signaler un contenu | RSS | Hébergé chez Blog4ever | Espace de gestion