J'voudros qu'cha seuche Noël de Bertrand COCQ

 

 

J’voudros qu’ cha seuche Noël

J’voudros qu’ cha seuche Noël, min pétit , min nénin ,
Pour que t’maman alle puisse t’armuché d’ses cadeaux .
J’voudros qu’cha seuche Noël malgré tous mes tourmints ,
Serre tes yux min bonhomme i est l’heure d’ faire dodo.

 

Eune vraie fête d’ Noël dins un monte solidaire
Pour que chacun i puisse enfin prier à s’mote
Pour vivre enfin eune nuit , sans tourmints , sans misère,
Ravisant l’ même étoile , serrés les uns aux autes.

 

J’voudros qu’ cha seuche Noël pour ch’tiot au carrefour
Qui tind s’main pour mendier , et qu’in n’ravisse même pas,
J’voudros qu’ cha seuche Noël pour ch’ nénin au Darfour
Qui deminte à minger et qu’in n’intindra pas.

 

Eune vraie fête d’ Noël pour les éfants sur terre,
Les éfants du Bon Diu, du Bon Diu ou d’un aute,
Pour vivre enfin eune nuit ,sans tourmints , sans misère,
Ravisant l’ même étoile , serrés les uns aux autes.

 

J’voudros qu’ cha seuche Noël pour l’mère qui prind l’avion
Qui tient l’main d’sin pétit intre deux policiers,
J’voudros qu’cha seuche Noël pour l’ père sans illusion
Qui vient tout juste d’apprinte qu’il étot licencié.

 

Eune vraie fête d’ Noël pour cheux qui ont souffert
Tout cheusses pour qui , ête paufe , arprésinte l’ seule faute,
Pour vivre enfin eune nuit , sans tourmints , sans misère,
Ravisant l’ même étoile , serrés les uns aux autes.

 

J’voudros qu’cha seuche Noël tout au long d’ l’autoroute ,
Dins les baraques in bos ,derrière tous les grillaches,
J’voudros qu’cha seuche Noël et qu’ eune bonne fos pour toutes
Personne n’euche comme maison un carton d’imballache.

 

Eune vraie fête d’ Noël pour ch’ti qui tout l’hiver
Rêvera de jours meilleurs dins l’incoignure d’eune porte.
Pour vivre enfin eune nuit , sans tourmints , sans misère,
Ravisant l’ même étoile , serrés les uns aux autes.

 

Pour vivre enfin eune nuit , sans tourmints , sans misère,
Ravisant l’ même étoile , serrés les uns aux autes.

Bertrand COCQ



23/12/2015
2 Poster un commentaire

A découvrir aussi


Inscrivez-vous au site

Soyez prévenu par email des prochaines mises à jour

Rejoignez les 792 autres membres

Referencement
Recommander ce site | Contact | Signaler un contenu | RSS | Hébergé chez Blog4ever | Espace de gestion