videos chti.c.la

 Cela serait super que chacun envoie une petite carte à l'auteur.

Il en sera flatté et cela alimentera ses conserverstions.

Voici son adresse postale:

PAUL SEBILLE

Rue de la Tranquilité

66490 SAINT JEAN-PLA-DE-CORTS

Min gardin Paul SEBILLE

Min Gardin

I n'est pon grammint lon, l'gardin qu'jai eu d'min père,

I fait l'tour de l'mason, aveuc eune grinne pièchinte;

L'bordure al est plein d'fleurs, et d'persi dins l'bonne tierre

Et d’thym qui sin bon qui pleuffe o bin qui vinte.

Quint  j'sus dins min gardin, là; j'connos pus personne,

Et dés qu'avril i pointe , qu'les crocus i s'démuchent,

Mi j'sais chou qué j'vas s'mer, même si l'orache i tonne.

Pon d'soin d'soin d'calindrier, ch'est l'timps qui faut qu'in r'muche.

I faut qu'in Février qué j'séme  porions, dare dare,

In Mars, al saint Joseph, mette quate lines ed peune tierre,

Et qu'les primmiers flageots et pis les épinards

I z'ont peur de l'gélée et qui faut les couvert.

Chés viux z'avottent raison quind i s'fiottent à cheulle leune,

Quind el co i cantot, quind chifflottent les osieux;

Min gardin attindot du matin et s'qu'a  l'breume,

Li i comptot sur  mi, et mi, je l'ravisot.

Des ails et de l'salate et pis des échalottes

Pou coper cheulle verdure qu'in toulle au fromache blinc;

Ravisez chés couleurs, nulle part i n'da des z'autes,

J'vous l'dis, ch'est l'paradis dins min tiot  coin d'gardin .

Tout dins l'fond d'min gardin, j'ai quère à m'inquermir,

R'wéttier l'iau de ch'fossé, acouter les osieux,

Tout in freumint mes yeux, r'passer tout mes souv'nirs,

Jé l'sais et pis j'l’ardis, min gardin ch'est l'pus biau.

Ch'ti qui connot point cha, connot pas sin bonheur,

J'voudros parfos li dire: " ravise d'un aute côté,

Si t'sins pus cheulle nature, si té n'sint pus les fleurs,

Alors, viens et suis-me, et rapprinds à marcher."

                                                                                         Paul Sébille

2éme prix de l'académie d'Arras 2005