videos chti.c.la

videos chti.c.la

M'lette à pére Noel "Raymond Lancial"

M'lette à père Noel
Min pauffe Père Noël, ed'pi l'timps que j'té connos, j'peux t'dire que j'sus fort mag'mint de ch'qui t'arriffe ! Mi, j't'a connu, y a quèques années (pour tout dire ..... y a soixante chinq ans, cha n'nous rajeunit pont !), quand té vénos à l'Cité des Mines dé l'Pugnoy. Nou parints i faijotent des mystères au soir du 25 décembre: fallot ête bien saches, fallot s'couquer d'bonne heure et, surtout,pont raviser quand qu't'allos vénir. Et d'nous raconter commint qu't'allos déchinte pa l'quéminée pour nous mette nou cadeaux ( intre nous, t'étos pont fort riche à l'époque, ch'étot l'pu souvint in' oranche,des chuques et in tit juet in bos). Adon, ches masons al's avotent tertoutes des fux à carbon et ch'étot facile pour ti d'passer pa ch'buot, mais j'a jamais compris commint qu'tin baudet i mingeot l'carotte qu'in avot mis pour li ! Achteur, j'a tros pitits éfants et j'douos t'dire qu'i rigol'tent comme des bochus quand j'leu raconte mes anciens Noëls' D'abord, i n'savent pu cho qu'ch'est in' queuminée, vu qu'à leu mason,y a l'chauffache central. Allez leu'z espliquer commint qu'o faijez pour déchinte ches juets. Ch'pu grand i m'a mein.me fait vir tin traîneau à fusées, s'il vous plaît !Et pour ches juets, alors là, pardon! Ches garchons, i n'rêfent que d'robots qui marchent, qui dansent et mein.me qui ramassent des trucs et qui peufent les lancer, ou bien des autos télécommindées et autes ordinateurs! Non, mais, Père Noël, t'as vu commint qu'in t'arrinche : achteur, t'as des cataloques rimplis plein d'machins qui march'tent à piles (rechargeapes, naturell'mint, mais i faut acater l'chargeur), ou bien des jux bizarres (mais « adaptés à l'âge et à la personnalité de l'enfant », comme ch'est dit dins ches prospectus qui comminchent à implir ches boîtes à lettes). Bref, i t'ont fait dév'nir in commerçant. D'nou timps, ches garchons i juottent aveuc des autos, des toupies ou bien des soldats d'plomb (qui sont dév'nus des pièches ed collection, tell'mint i s'font rares !).  J'sais bien cho qu'in va m'dire: i faut vife avec sin timps et in sommes dins l'ère d'l'électronique. Ch'est pétète vrai, mi je n'sus pont conte el progrès, mais avouez qu'y a d'l'abus: quand j'vouos mes pitits, je m'dis souvint qu'i n'n'ont tell'mint, qu'i s'mettent pu à rien et ches juets, cha valse ed tous les côtés et, in fin d'compte, quo qu'i'z ont appris? Pont grand cosse, ah si à canger ches piles!
Et pour ches files, o'z avez vu l'traval ? Et des poupées qui ont l'tête ed ches canteuses d'la Star Ac par chi, et des autes qui z'ont « toute la panoplie », y compris ch'bidet aveuc des longs caveux par là. Là, in r'vinche, l'progrès i n'a pont suivi : y a toudis l'batt'rie d'cuisine aveuc ches accessoires pour faire à minger à papa et tout cha qu'i faut pour laver et arpasser ch'linche ! Té vouos, Père Noël, t'as pétête eu tort d'les laicher faire, pasqu' achteur, ch'est pu des menuisiers et des peintes qu'i t'faut dins t'n atelier d'fabrication d'juets, mais des électroniciens ! Mais, ch'est pont de t'faute, t'étos tout seu, et les autes i sont gramin à vouloir vinte à tout prix! Et l'pire (et j'diros mein.me el pu pire, comme in dit dins nou coin), là'd'dins, ch'est qu'i faut d'pus in pu d'sous pour faire plaiji à ches jon.nes et là, ya pont eu d'progrès, cha sérot putôt l'contraire. Mi, j'cros cor qu't'existes, Père Noël, mais i faut dire eq' dins m'tiète j'a pont pu d'dix ans! J'a biau avoir in ordinateur, j'm'amusse cor, aveuc mes pitis, à jéter des caillaux dins l'lau, à juer au foteballe ou cor à cache-cache, comme dins l'timps. Et j'té jure qu'à ches momints-là, tous ches manicraques électroniques, i n'existent pu. Alors, Père Noël, cros-me, t'es pont tout seu et je n'te deminte qu'in' cosse: continue à faire rêver nou pitits ... et ches grands, i n'ont grand bésoin in ch'momint. Et n't'in fais pont, j'a cor l'goût d'tes oranches dins m'bouque mais, escusse-me, jé n'mettrai pu d'carotte pour tin baudet, al sont in.mingeapes et pi j'a pu d'gardin !
Raymond Lancial


12/12/2011
4 Poster un commentaire

A découvrir aussi


Inscrivez-vous au blog

Soyez prévenu par email des prochaines mises à jour

Rejoignez les 1042 autres membres