L'café de m'mère

L' café de m' mère

Tout au long d'em jeunesse - ej nin garde el souv'nance -
J'ai vu m' mère affairaîe à tisonner sin fu.
Tous les après-midi, c'étoit réglaîe d'avance,
Ali' mettoit, rimplie d'iauw, eun' plein' boulloir' ed'ssus.
Après çà je l'guettois aller jusqu'à l'armoire
Querre el boîte à café, artirer sin moulin
Et bin amoureus'mint, in surveillant l' boulloire,
El moulin su' sin gron, es' mette à moude el grain.
J'ai pont bésoin d' vous dir' qu'au biauw miliu dé l'tabe,
L'alambic étoit là qu'aile attindoit déjà,
L'estérieur bin luisant mais, c'est plus que probabe,
L'intérieur culottaîe comme un quart ed soldat.
Em' Mère, sin grain moulu, aile alloit à l'caf'tière ;
Alle in soul'voit l' couverc' et dins l' filtr' tout douc'mint,
ln l'éparpillant bin, versoit l' poudr' qu'ail' v'noit d' faire.
Alle y rajoutoit mêm' dei chicoraîe ed'dins.
Et c'est à c'momint là qu'on intindoit l'romance
Del vapeur s'écappant dei gross' boulloir' panchue.
C'étoit comme eune invite à activer l' cadence;
y falloit passer l'jus, l'iauw aile étoit boulue.
ln s' régalant déjà à l'odeur qu' çà dégage,
Ej vois M' Mère verser l'iauw ed'ssus l' poude ed café,
Trois fois, quat' fois, cinq fois rallongeant sin breuvage
Et devinant l'momint qu'y faudroit s'arrêter.
Quant il étoit fin prêt, aile s'occupoit des tasses.
Alle in sortoit grammint, car faut pont l'oublier,
Attiraîes comm' des mouques par el fumet tenace,
On voyoit arriver les commèr's du quartier.
Et buvant, comme on dit, lu bon jus à l'ficelle,
Avec au creux dei langue, un p'tit bout d'suer' qui fond
Sgard, Nana, Mèr' Lecul et m' brav' Mèr' Gabrielle
Vidait'nt tout l'alambic jusqu'au fond du tréfond.
Alors, enfin arpues d' café et d' bavardages
Contint's d'avoir passaîe insemb' un bon momint,
Chacqueune d'elle artournoit s'armette à sin ménage
Tout in pinsant déjà à l'teintie du lend'main.
Félix Valette


07/03/2011
3 Poster un commentaire

A découvrir aussi


Inscrivez-vous au site

Soyez prévenu par email des prochaines mises à jour

Rejoignez les 832 autres membres

Referencement
Recommander ce site | Contact | Signaler un contenu | Confidentialité | RSS | Hébergé chez Blog4ever | Espace de gestion