videos chti.c.la

Quand in a ses quinze ans
Aujord'hui t'as quinze ans, et ch'est t'n'anniversaire,
T'es déjà pus un gosse et t'es point core un homme,
T'as l'ache dusse qu'in est pus dins les cotrons de s'mère,
Tout en avint core peur e d'sortir de s'masonne.

Quind in a ses quinze ans, in est fier e d'smoutrer
Qu'in est pus un gamin, que l'tiote moustache al pousse,
Qu'les filles i nous ravisent, qu'in c'minche à fricoter,
In s'prind pou Don Juan, in est pus biau qu'tertous.

Pou s'habiller, fini, in n'met pus n'importe quoi,
Faut point qu'cha seuche trop larche, ni trop court, ni trop long,
Bien souvint, dins cheulle glace, in ravise si cha va,
In s'pomponne comme eune fille, sûr qu'in est biau garchon.

Quind in a ses quinze ans, et qu'in vot les parints,
In a souvint l'invie de s'moquer des pus vieux,
In pinse qu'i sont rétros, et in n'les coprint point,
Quind i racontent leu vie, in s'moque tout douch'mint d'eux.

In ravise les pus tiots aveuc l'air supérieur,
"Peut-on êtes si débile à ch'l'ache là, j'vous déminte!",
In roulint des épaules pou faire un tiot peu peur,
"I sont bin trop bèbêtes pou pouvoir nous coprinte"!.

Quind un a ses quinze ans et qu'in sociètè
In vot dinser l'z'aînés, ch'est presque dèlirant,
Leu javas, leu Polka, ch'est fini, dépassé,
A ch'teure ch'est ridicule, ch'tot bon y a cinquante ans.

Parfos in réfléchit su les gouvernemints,
Et in s'dit qu'si les jonnes arotent leu mot à dire,
Y arot sûrmint des cosses qui vérotent du cang'mint,
Et qu'note av'nir à nous, in pourrot sé l'bâtir.

Quind in a ses quinze ans, in est prêt à foncer
Vers la vie, vers l'amour, in abattrot l'brouillard,
In acoute pus personne, in veut la liberté,
"Ch'est nous les rois du monte, arculez vous, ou gare"!

Mais quind in est pus vieux, avinchint dins la vie,
Qu'in s'marie à nos tour et qu'in a des infants,
In rigole in nous même, et bin souvint in s'dit:

"Qu'j'étot bête à ch'timps là, quind j'avos mes quinze ans".

Paul Sébille