On a vu pire d'André BALLE dit "Tit Louis d'Peuplingues"

 

 

 tit louis.jpg

 

 

ON A VU PIRE
Acoutez-chi mes gins ... acoutez ch'tiote histoire que j'vas vous conter:
y avot eune fos ... 0 voyez, cha commin ché bin comme dins les contes ...
y avot eune fos, un tiot ménage eud' pauvers gins ...
Figurez-vous qu' ch'est un ménage
Qu'il attindot un héritage ...
J'vous parle eud' cha, ch'est déjà viux,
y a mille ans ... Peut-ête eud' plus ...
Ch'étot Joseph sin nom à li
Ets'tit femme alle s'app'lot Marie,
y z'avait' ent espoir sur un fiu
Pour eul' baptijer : Tit Jésus,
Oui mais, voilà, y a des méquants
Qui z'attindait'ent après l'éfant
Pour li fair' tous les mill' misères.
Eul' père y dit - « Quo que j 'vas faire .
Je n'vos qu'eune chose ... y faut filer .
Marie! Va vit' queurt eul' baudet
Té prindras des loqu's pour l'éfant
Et pis en route ! Il est grand temps !...
Les v'là partis dins la nature
Aveuc eul baudet, sans voiture,
Marie, jouquaie su l'canasson,
Joseph aveuc eul' baluchon,
y z'ont marchaie des jours, des nuits,
Sans pouvoir trouver un abri...
Personne il avot pitiaie d'eux,
On les prindot pour des pouilleux
Qui z'avait'ent fait un coup d' Jarnac.
Il a fallu qu'cha seuche eune vaque
Qu'alle arcule dins l'fond de s'n'étabe,
Pour fair' plache à ches misérabes ...
Il étot temps! su l'coup d'minuit
Il étot là ... Pauver pitit,
Marie alle l'avot tant bien qu'mal
Intortillaie aveuc d'eul' palle ...
Ch'étot vers Noêl... Et par malheur
y faijot un d'ches frods d'voleur!
Que l'vaque aveuc ses bons gros yux,
ln voyant ch'tiot éfant tout nu,
Alle li donnot un peu d' chaleur
Aveuc tout l'haleine eud' sin coeur. ..
Ch'est pour vous dir' mes chers amis,
Que si nous, au jour d'aujourd'hui, o z'avons nos p'tits imbêt'mints
... Mêm' que, des fos on n'n'a gramint,
Faut pon sombrer dins l'désespoir. ..
Les sinistraies de m'tiot' histoire
y n'ont jamais perdu l'sourire.
Et pourtant, eux, y z'ont vu pire ...
André BALLE
(alias Tit Louis d'Peuplingues)
enregistré sur disque Déesse DPX 812 (45 T) et DDLX 236 (33 T)



25/12/2014
2 Poster un commentaire

A découvrir aussi


Inscrivez-vous au site

Soyez prévenu par email des prochaines mises à jour

Rejoignez les 776 autres membres

Referencement
Recommander ce site | Contact | Signaler un contenu | RSS | Hébergé chez Blog4ever | Espace de gestion