J'VAS L'DIRE A MIN PERE !

Incor tout gamin, à l'écol' primaire

Quand in camarate étot mauvais joueur,

Et m'volot mes mapp', cha partot du coeur :

J'VAS L'DIRE A MIN PERE !

Min père savot tout ; i savot tout faire,

Armette in carreau, réparer in fu,

Et que d'fos ch'consel ej' l'avos intindu :

D'MIND'LE A TIN PERE !

Dès fos, j'n'étos el victim' première,

Quand j'étos indine,quand j'avos mal fait, 

N'y avot que ch'mot là pou fair' ed' l'effet :

J'VAS L'DIRE A TIN PERE !

Pis, in grandichant, chingeant l'caractère,

J'n'ai pu rien d'mindé : je m'croyos si fort !

Mais j'ai dû r'connaîte e' qu' j'avos bin tort

DE M'PASSER D'MIN PERE...

Min père i n'y est pus, mais s'voix familière

Résonne à m'z'orelles el jour et la nuit

Et je m'dis incor quand j'ai des innuis :

J'VAS L'DIRE A MIN PERE !

Clémént DRUON